يوم في الجنة مع سالي

 بسم الله الرحمن الرحيم

يوم في الجنة مع سالي

مع الأرنب والسلة السحرية والفراشة حورية

كان يا ما كان يا سادة يا كرام ولا يحلى الكلام إلا بذكر 

 النبي عليه لصلاة والسلام

كان فيه بنت رقيقه صغنونه دايما عايشه في الأحلام والخيال

البنت دي كان اسمها

ســـــالـــــي

في يوم من الأيام صحت سالي من النوم وهي سعيده

 وفرحانه وقالت لماما

ماما ممكن أنا اللي احكيلك حدوتة قبل النوم النهارده؟

ضحكت ماما وقالت: ياريت بس يلا نلحق نفطر علشان نروح 

مدرستنا

وبالليل غسلت سالي سنانها و سرحت شعرها ودخلت سريرها

 وقعدت ماما جنبها تسمع الحدوتة

سالي :

كان يا ما كان يا سادة يا كرام ولا يحلى الكلام إلا بذكر  النبي

 عليه لصلاة والسلام

ماما : عليه الصلاة والسلام

سالي : حدوتي النهارده عن حلم جميل حلمته ..حلمت إني

 قضيت يوم كامل في الجنة يا مامتي

ماما : يارب يوعدنا الجنة يا قلبي

سالي : حلمت يا مامتي ان الصندوق بتاع اللعب بتاعي فجأت 

اتحول لصندوق سحري وانا بادور عاللعب بتاعتي وقعت فيه 

ولقيت نفسي في الجنة ...حلوة اوي الجنة يا مامتي

وعلى باب الجنة لقيت أرنب لونه أبيض نشيط وبيتنطط اسمه زعتر

وفراشة رقيقه اسمها حوريه

اخدني الأرنب من ايديا وحورية طايره فوقنا وقعد يفرجني على 

الجنة والالعاب اللي فيها والشجر والفاكهة و المراجيح وحاجات

 حلوة اوي يا مامتي

وقضيت وقت جميل خالص بس يا خساره الحلم خلص ورجعت من 

الجنة

هو أنا ينفع موت و أنا صغيره أحلى علشان أعرف العب و اتنطط 

واتفسح في الجنة؟

ماما : العمر الطويل ليكي يا حلوة ...بس حتى لو متي وانتي كبيرة 

حتدخلي الجنة وعمرك 30 سنة زي ما قال نبينا المصطفى 

وحتقدري تستمعي في الجنة بحاجات جميله وتقدري حتى تطلبي 

العاب وتلعبي وتتمرجحي  هناك حتكون الأمور غير الدنيا خالص

سالي : بس لما أكون صغيره حتبسط اكتر

ماما :  مش أنا كبيرة؟ وباعرف اتبسط معاكي وباكون فرحانه اوي 

لما ألعب معاكي بعروستك وأمرجحك في النادي ونلعب بالكورة؟

سالي : آه

ماما : طيب  مش انتي تحبي تكبري زي ماما وتتجوزي وتخلفي 

ويكون عندك أولاد تلعبي معاهم وتفرحي زيي كده؟

سالي : آه

ماما : يبقى نقول يارب يخليني لماما وبابا و اخواتي واكبر ويبقى 

عندي اولاد احبهم والاعبهم ونكبر سوى وندخل الجنة كلنا بإذن الله

سالي : يارب يا ماما بس حيكون فيه أرنب اسمه زعتر وفراشه 

اسمها حورية ؟ أصلهم بقوا أصحابي أوي

ضحكت ماما وخدت سالي في حضنها وقالت : غمضي عينيكي و 

ادعي ربنا تلاقي زيهم في الجنة

وتوه توته خلصت الحدوتة

حلوة والا ملتوته؟

الحدوتة دي ألهمني بعض من أفكارها صديقة عزيزة وابن 

غالي...جزاهم الله خير الجزاء

جنة والحجاب

بسم الله الرحمن الرحيم

جنة والحجاب

********************

كان يا ما كان يا سعد يا كرام

ولا يحلى الكلام إلا بذكر النبي

عليه الصلاة والسلام

كان فيه بنوته جميله صغنتوته

اسمها جنة

جنة كانت بنوته جميله عمرها 12 سنة

في يوم من الأيام دخلت على مامتها وسالتها :

ماما انتي اتحجبتي من زمان؟

ردت ماما عليها وقالت : من وعمري 13 سنة يا قمري

جنة : يعني أكبر مني بسنة بس؟

ماما : بالضبط

جنة : طيب يا مامتي هو أنا المفروض اتحجب امتى؟

صاحبتي منى اتحجبت وجت المدرسة النهارده

وميس هناء قالتلها : المهم تكوني مقتنعه بحجابك

يعني إيه تكون مقتنعه يا ماما؟

ماما : شوفي يا جنة زمان كانوا بيقولولنا الحجاب اقتناع

يعني البنت لازم تكون مقتنعه بانها بتعمل حاجه صح

بس الحجاب مافيش فيه حاجه اسمها اقتناع داه طاعه

انتي بتصلي وبتصومي ليه؟

جنة : علشان ربنا قال ان الصلاة والصوم من أركان الإسلام

ماما : يعني بتسمعي كلام ربنا ؟

جنة : اكيد يا ماما

ماما طيب ربنا سبحانه وتعالى في آيات كتير أمر زوجات

 الرسول صلى الله عليه وسلم

بالحجاب

قال تعالى : ( يا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاء الْمُؤْمِنِينَ يُدْنِينَ عَلَيْهِنَّ مِن جَلابِيبِهِنَّ ذَلِكَ أَدْنَى أَن يُعْرَفْنَ فَلا يُؤْذَيْنَ وَكَانَ اللَّهُ غَفُورًا رَّحِيمًا) الأحزاب أية 59

جنة : يبقى داه أمر من ربنا للبنات يا ماما والنساء واحنا نسمع كلام ربنا

يعني أنا لو اتحجبت حكون باسمع كلام ربنا زي ما باصلي وباصوم

ماما : أيوه بتطيعي ربنا في كل أوامره يا حبيبة ماما

جنة : علشان كده حضرتك بتكلميني دايما عن الحجاب لما البنت تبتدي تكبر وخليتيني اغير لبسي السنتين اللي فاتوا ؟ يعني اول ما حاكبر حتقوليلي لازم اتحجب؟

ماما : أكيد أنا وكمان بابا وحتى أخوك علي

جنة : طيب وجود أختي؟

ماما : جود لسه 7 سنين حنستنى عليها لما تبقى في عمرك وهي اكيد حتشوفك محجبه وشايفاني محجبه ومن نفسها حتسأل وتتكلم عن الحجاب وتتحجب

جنة : بس يا ماما محدش حيتريق على شكلي ويقولي ايه اللي انتي لابساه داه؟

ماما : انتي بتلبسي الحجاب ترضي مين يا جنتي؟

جنة : ربنا طبعا

ماما : يبقى نهتم بربنا والا بالناس؟ نهتم برضاه وجنته والا الناس؟

جنة : ربنا طبعا يا مامتي يا حبيبتي

ممكن يا ماما أجرب الحجاب بتاعك؟

ماما : ممكن طبعا

وقفت جنة جنب ماما تجرب الحجاب وبصت ماما عليها حست ان بنتها ملاك

وفتح الباب ودخل بابا بص وجريت عليه جنة

رفعها بابا وقالها : اتحجبتي يا جنتي؟ برافو عليكي

بصت جنة لماما وهي بتضحك وقالت : اتحجبت الحمدلله يا بابايا

وتوته توته خلصت الحدوتة

حلوة والا ملتوته؟

http://www.youtube.com/watch?v=oAqWz9_rq-Q

يعني إيه كلمة وطن؟

يعني إيه كلمة وطن؟

في بدايات أيام الثورة المصرية

عاشت الأسر في الإسكندرية رعبا هائلا خاصة في غياب الشرطة و إثارة الرعب بوجود

 البلطجية

ونظرا لأن زوجي و إبراهيم ابني كانوا محبوسين في نادي الرماية بستة أكتوبر بسبب 

المشاكل هناك وقفل الطرق بين القاهرة والإسكندرية

فرعب أولادي الصغار : يحيى ويوسف كان أكبر مما تتخيلوا وخاصة ليلا

بس ابني الكبير الله يكرمه كان بينزل في اللجان الشعبية بيقضوا الليل وهو ماسك البندقية

 و يحرس البيوت هو والشبا ربنا يكرمهم

شباب اثبت انهم مصريين قلبا وقالبا

كان لما المتظاهرين يمروا تحت البيت كنت اديهم الكاميرا واقولهم صوروا المصريين 

اللي قلوبهم من ذهب 

ولما عربيات الجيش تعدي وتهز البيت وتفزعهم اقولهم شايفين جيشنا بيحمينا مافيش

 خوف

كنت طبعا طول اليوم اقلب في القنوات الإخبارية واتناقش معاهم عن الشهداء و اتناقش 

معاهم عن ان المتظاهرين انتفضوا علشاني وعلشانهم وعلشان حبيبتهم مصر

ولما كانوا يقولولي بس دول ماتوا حرام كده

أقعد افهمهم انهم ماتوا علشان حقنا ولازم نكمل المشوار والا دمهم يروح هدر

ولما كانوا يقولولي ممكن نغير القناة نتفرج على حاجه تانيه ؟

كنت أقولهم ينفع منعرفش اللي بيحصل في مصرنا؟

وفي الليل كان صغاري ينامون إلى جواري ومع كل صوت صغير في الشارع يدب 

الرعب في نفوسهم ويخافوا 

ودار الحوار داه والحدوتة دي بيني وبينهم في إحدى الليالي

يوسف : أنا خايف يا ماما هما البلطجية دول ممكن يطلعوا علينا في البيت؟

ماما : يا حبيبي انت مش شايف أخوك و اولاد الجيران كلهم واقفين في الشارع ازاي 

بيحرسونا؟

يحيى : مكنش لازم يعملوا مظاهرات يا ماما 

ماما : لا يا يحيى كان لازم يعملوا مظاهرات

انت لسه دلوقتي صغير 

يمكن متعرفش يعني إيه كلمة وطن

مش انت يا يحيى لما بيكون فيه ماتش كورة وفريقنا القومي بيلعب بتشجع مصر؟

يحيى : طبعا يا ماما

ماما : أهو فريق الكرة المصري داه جزء من الوطن مصر

   

لما الثوار قالوا : حقنا لازم يرجع لنا

مصر دي أمنا كلنا

كلنا انتفضنا ووقفنا معاهم وقلنالهم انتم صح

احنا سكتنا كتير عن حقنا

يحيى : بس احنا عايشيين كويس يا ماما ومش متضايقين

ماما : انت دلوقتي عايش كويس علشان لسه صغير وبابا بيعمل لك كل حاجه بس لو 

بصيت حواليك 

حتلاقي ناس كتير مش لاقيه الاكل ولا المية ولا الدوا ولا العلاج

مش انت بتروح مع النادي المستشفيات و دور الأيتام وبتشوف أد إيه الفقر صعب قوي ؟

يحيى : آه يا ماما

ماما : طيب ينفع يكون فيه كمية الفقر دي في بلد غنية بيسرقنا فيها الكبار؟

يحيى : لا يا ماما لازم ناخد من فلوسهم للفقرا

ماما : مش كده وبس يا يحيى لازم يتحاسبوا ومصر ترجع لها فلوسها 

ونبدأ نتعامل بالعدل مع الناس 

وقتها مصر حترجع غنية وقوية 

وقتها كلنا حنرفع راسنا ونفتخر بمصر ومصريتنا كوطن

فهمتوا بقى يعني إيه كلمة وطن؟

وطن يعني مصر الحرية

مصر الخير

مصر الصحة

مصر العدل

يعني إيه كلمة وطن يا يوسف؟

يوسف : وطن يعني

زي اغنية 

 يا بلادي يا بلادي أنا بحبك يا بلادي 

يعني إيه كلمة وطن يا يحيى؟

يحيى : وطن يعني

مصر 

صحيح يا ولاد وطن يعني مصر بلادي

ولازم كمان نفتكر يا أولاد إن مصرنا رجعلتنا

بدماء شهداء وثوار مصر

ربي يرحم شهدائنا ويعز ثوارنا علشان يكملوا مسيرة مصر لأبهى عصورها

وتوته توته خلصت أجمل حدوتة

حدوتة مصرية

*************

ملحوظة : كان زمان فيه برنامج اطفال إسمه كوكي كاك

كانت بطه كبيرة قوي لونها أصفر و معاها الفنانة إيمان الطوخي 

وفي مرة تسائلت كوكي كاك : يعني إيه كلمة وطن؟

وردت عليها إيمان الطوخي فهمتها بأغنية

يعني إيه كلمة وطن

من أيام الثورة و أنا بادور عالأغنية دي علشان اكمل البوست

بس مع الاسف ملقتهاش خالص

بس حبيبتي مستكة جابتلي كلمات الاغنية


جزاها اللي عني خير الجزاء

****************




Mesteka Za'tr

يعني ايه كلمة وطن

يعنى إيه كلمة وطن ؟!

كلمات :- شوقى حجاب

يعنى إيه كلمة وطن ؟!

يعنى واو ، و طه ، و نون

واو دى وادى

طه دى طيبه

أما نون ناس بلادى ..

اللى بيسابقوا الزمن !!

يعنى إيه كلمة وطن ؟!

يعنى جسم و روح و راس

جسـم حى و روح محبة

راس تفــــــــكر للى جى

لاجل يجى يتحضــن !!

يعنى إيه كلمة وطن ؟!

يعنى بيت و غيط و فاس

بيت أمان و غيط حنــــان

و فاس يبوس خد الغيطان

يبقى لحيـــــاتنا تمن !!

يعنى إيه كلمة وطن ؟!

يعنى يد و عين و قلب

يد صانعه و عين بترعى

و قلب ينبض شمس طالعة

و القلوب تصبح سكـــــن

هوا ده معنى الوطن

هوا ده معنى الوطن

هوا ده معنى الوطن